काठमाडौं: जसपा नेपालका अध्यक्ष उपेन्द्र यादवले वर्तमान सरकार अन्य राजनीतिक दललाई कमजोर बनाउने रणनीतिमा लागेको आरोप लगाएका छन्।
ललितपुरमा आइतबारदेखि सुरु भएको जसपा नेपालको केन्द्रीय समिति बैठकमा राजनीतिक एवं संगठनात्मक प्रतिवेदन प्रस्तुत गर्दै अध्यक्ष यादवले सरकारको नीति असन्तुलित रहेको टिप्पणी गरे। उनले केपी शर्मा ओली नेतृत्वको सरकारको आयु लम्ब्याउन जालझेल भइरहेको र अन्य दलहरूलाई कमजोर बनाउने नीति अवलम्बन गरिएको बताए।
यादवको प्रतिवेदनमा सरकारले दुई दलीय व्यवस्था स्थापित गर्ने प्रयासस्वरूप थ्रेसहोल्ड बढाउने विधेयक ल्याएको उल्लेख गरिएको छ। उनले सो विधेयकलाई बहुदलीय व्यवस्थामाथिको प्रहारको रूपमा चित्रित गरे।
उनको भनाइमा, सत्ता टिकाइराख्ने स्वार्थका कारण विश्वासको संकट उत्पन्न भएपछि प्रचण्ड नेतृत्वको सरकार पतन भयो। त्यसपछि ठूला दलहरू मिलेर बनेको वर्तमान सरकार मुलुकको सुशासन, समृद्धि र विकासको पक्षमा ठोस कार्ययोजना ल्याउन असफल भएको उनको आरोप छ।
सरकारप्रति जनताको नैराश्यता
सरकारप्रति जनताको असन्तुष्टि बढ्दै गइरहेको उल्लेख गर्दै यादवले सुशासन र आर्थिक विकासका लागि ठोस नीति, कार्यक्रम, तथा योजना नदेखिएको जिकिर गरे। उनले राष्ट्रिय हितको रक्षा र परराष्ट्र नीति निर्धारणमा सरकार चुकेको र यसले सरकारलाई असफल सावित गरेको दाबी गरे।
भूमि अध्यादेशको विरोध
संसदमा प्रस्तुत छ विधेयकमध्ये “नेपाल ऐनलाई संशोधन गर्न बनेको भूमि सम्बन्धी अध्यादेश” जनताको हितविपरीत भएको भन्दै जसपा नेपालले त्यसको विरोध गर्ने बताएको छ। यादवले उक्त अध्यादेशविरुद्ध पार्टी दृढ रूपमा उभिएको उल्लेख गरे।
बैठकका मुख्य एजेन्डा
तीन दिनसम्म चल्ने बैठकमा हालको राजनीतिक परिस्थितिको समीक्षा, पार्टीले गत भदौदेखि सञ्चालन गरेको “जनतासँग जसपा नेपाल आधारभूत संगठन निर्माण अभियान” को मूल्यांकन र आगामी रणनीति तय गरिने प्रवक्ता मनिष सुमनले जानकारी दिए।
बैठकमा अभियानमा संलग्न नेताहरूले कार्यप्रगति विवरण प्रस्तुत गर्नेछन्। साथै, जसपा नेपालका भातृ संस्थाहरू तथा विभिन्न कमिटीहरूको अधिवेशनबारे छलफल हुने प्रवक्ता सुमनले बताए।
