काठमाडौं: प्रतिनिधिसभामा आगामी आर्थिक वर्ष २०८२/८३ का लागि सरकारले प्रस्तुत गरेको वार्षिक नीति तथा कार्यक्रममाथि आजदेखि औपचारिक छलफल सुरु हुँदैछ।
प्रधानमन्त्री केपी शर्मा ओलीले राष्ट्रपति रामचन्द्र पौडेलद्वारा वैशाख १९ गते, शुक्रबार संघीय संसद्को संयुक्त बैठकमा प्रस्तुत गरिएको नीति तथा कार्यक्रममाथि छलफल होस् भन्ने प्रस्ताव प्रतिनिधिसभामा पेस गर्नुहुने कार्यसूची रहेको संघीय संसद्का महासचिव पद्मप्रसाद पाण्डेले जानकारी दिनुभयो।
नीति तथा कार्यक्रममाथि सांसदहरूबाट दर्ता भएका संशोधन प्रस्तावहरू प्रस्तुत गरिने र सम्बोधनमाथि विस्तृत छलफल गरिनेछ।
कार्यसूचीअनुसार, प्रतिनिधिसभाको बैठक आज बिहान ११ बजे बस्नेछ।
यसअघि, राष्ट्रियसभामा भने उक्त नीति तथा कार्यक्रममाथिको छलफल आइतबारदेखि नै सुरु भइसकेको छ। आजको बैठकमा पनि छलफल जारी रहनेछ। राष्ट्रियसभाको बैठक दिउँसो १ः१५ बजेका लागि तोकिएको छ।
