काठमाडौं: संघीय संसद्का तीन वटा समितिको बैठक आज सिंहदरबारस्थित कार्यालयमा बस्नेछ। संघीय संसद् सचिवालयका अनुसार उद्योग तथा वाणिज्य तथा श्रम तथा उपभोक्ता हित समितिको बैठक बिहान ११:३० बजे सुरु हुनेछ। उक्त बैठकमा माउन्ट एभरेस्ट ब्रुअरी प्रालिमा कार्यरत श्रमिकहरूको पारिश्रमिकसम्बन्धी विषयमा अर्थ मन्त्रालय, नेपाल राष्ट्र बैंक र उद्योग मन्त्रालयका प्रतिनिधिसँग छलफल हुनेछ।
यसैगरी, विकास, आर्थिक मामिला तथा सुशासन समितिको बैठक बिहान ११:०० बजे बोलाइएको छ। बैठकमा भौतिक पूर्वाधार तथा यातायात मन्त्रालय तथा मातहतका निकायहरूको अर्धवार्षिक पुँजीगत बजेट कार्य प्रगतिबारे समीक्षा गरिनेछ।
त्यसैगरी, दिउँसो १:०० बजे बस्ने राज्य व्यवस्था तथा सुशासन समितिको बैठकमा सङ्घीय निजामती सेवाको गठन, सञ्चालन तथा सेवाका सर्तसम्बन्धी विधेयक २०८० माथि दफावार छलफल हुनेछ।
