गलकोट (बागलुङ): विसं २०६७ मा बागलुङ नगरपालिका–५ मालिकाबाट तीनवटा भैँसी लिएर उपल्लाचौर, आमबोट आएका नन्दलाल सापकोटा अहिले ३५ भैँसी र सात गाईको मालिक बनेका छन्।
बागलुङ–४ उपल्लाचौर आमबोटमा १५ रोपनी क्षेत्रफलमा ‘सापकोटा गाईभैँसी फार्म’ स्थापना गरी पशुपालनलाई व्यावसायिक रुप दिएका सापकोटा अहिले यस क्षेत्रमा सफल किसानका रूपमा परिचित छन्।
१४ वर्षको निरन्तर मेहनतले बनायो सफल किसान
१४ वर्षअघि तीन भैँसी र एक गाईबाट सुरु गरेको व्यवसाय आज करोडौँको लगानी पुगेको छ। हाल फार्ममा दैनिक १६० लिटर दूध उत्पादन भइरहेको छ, जुन उनले आफैँ बजारीकरण गर्दै आएका छन्।
“भारतको मेघालयमा रोजगारीका क्रममा नेपालीहरूले गाईपालनबाट राम्रो आम्दानी गरेको देखेपछि म पनि यस व्यवसायप्रति आकर्षित भएँ। विसं २०६७ मा जन्मथलो मालिकाबाट तीन भैँसी र एउटा गाई ल्याएर व्यवसाय सुरु गरेँ। अहिले फार्म विस्तार हुँदै करोडौँको लगानी पुगिसक्यो,” सापकोटाले सुनाए।
हाल उनका दुईवटा ठूला गोठमा ३५ भैँसी र सात गाई छन्। उनले पाँच जनालाई प्रत्यक्ष रोजगारी दिएका छन्। व्यवसाय बढ्दै जाँदा केही समय फार्ममा ५२ गाईभैँसीसमेत पुगेको थियो।
उत्पादन र आम्दानी
सापकोटाका अनुसार उनी मासिक रु पाँचदेखि छ लाखसम्म आम्दानी गर्छन् भने मासिक बचत रु एक लाख सम्म छ। दूध बिक्रीमा कुनै समस्या नरहेको र बागलुङ बजारका घरदैलोमै पुर्याएर बिक्री गरिरहेको उनले बताए।
चुनौती र समाधान
व्यावसायिक पशुपालन फाइदाजनक भए पनि खर्च धेरै हुने र जोखिमसमेत बढी हुने उनको अनुभव छ। “दीर्घकालीन सफलता प्राविधिक ज्ञान र निरन्तर मेहनतमा निर्भर हुन्छ,” सापकोटाले भने।
बागलुङ नगरपालिकाले पशु फार्मलाई प्राविधिक सहयोग गर्दै आएको छ भने २०७३ मा प्याक्ट परियोजनाबाट १० लाख अनुदान प्राप्त गरी आधुनिक गोठ निर्माण गरिएको उनले बताए। “राज्यले पशुपालन प्रवर्द्धनका लागि अनुदान दिए पनि उत्पादन र निरन्तरताका आधारमा मात्र वास्तविक किसानले लाभ लिन सक्छन्,” उनले थपे।
बागलुङ बजारका साथै पर्वत र म्याग्दीबाट पनि दूधको माग आउने गरेको छ। अहिले दूधको मूल्य प्रतिलिटर रु १२० छ।
१० वर्षसम्म भारतको मेघालयमा काम गरेका सापकोटा नेपाल फर्किएर पशुपालन व्यवसायमा लागेका हुन्। निरन्तर मेहनत र लगनशीलता भएमा पशुपालनबाट राम्रो आम्दानी गर्न सकिने उनको विश्वास छ।
