मुस्ताङ: चालु आर्थिक वर्षको पहिलो छ महिनामा यहाँका प्रादेशिक कार्यालयहरूको पुँजीगत खर्च निराशाजनक देखिएको छ, जबकि सङ्घीय कार्यालयहरूको खर्च सन्तोषजनक रहेको पाइएको छ।
जिल्ला कोष तथा लेखा नियन्त्रक कार्यालयका अनुसार चालु आर्थिक वर्षका लागि विनियोजित बजेटको अनुपातमा प्रादेशिक कार्यालयहरूको खर्च अपेक्षाकृत कमजोर रहँदा सङ्घीय कार्यालयहरूको खर्च तुलनात्मक रूपमा सन्तोषजनक रहेको छ।
कोष नियन्त्रक जब्बरबहादुर भण्डारीका अनुसार सङ्घीय कार्यालयहरूमा साविककै जनशक्ति परिचालित भएकाले खर्च सन्तोषजनक देखिएको हो। तर, प्रादेशिक कार्यालयहरूमा नयाँ संरचना थपिएको, जनशक्ति अभाव रहेको र प्रदेश सरकारको अस्थिरता जस्ता कारणले बजेट खर्च अपेक्षित रूपमा हुन नसकेको बताउनुभयो।
चालु आर्थिक वर्षका लागि सङ्घीय, प्रादेशिक कार्यालय र स्थानीय तहका लागि कुल रु ३ अर्ब ७९ करोड ८६ लाख ९० हजार बजेट विनियोजन गरिएकोमा पहिलो छ महिनामा रु १ अर्ब ६६ करोड मात्र खर्च भएको छ।
स्थानीय तह र सङ्घीय खर्चको अवस्था
मुस्ताङका पाँच स्थानीय तहका लागि चालु आर्थिक वर्षमा रु ९७ करोड ३८ लाख २७ हजार वित्तीय हस्तान्तरण बजेट विनियोजन गरिएको थियो। साउनदेखि पुस महिनासम्म ती तहहरूले रु ४६ करोड ६५ लाख रकम खर्च गरिसकेका छन्।
सङ्घीय कार्यालय र सङ्घीय अनुदानतर्फ रु २ अर्ब ९२ करोड ३९ लाख बजेट विनियोजन गरिएकोमा समीक्षाअवधिमा रु १ अर्ब ४१ करोड ६१ लाख खर्च भइसकेको छ।
छ महिनामा रु ५ करोड ६० लाख राजस्व सङ्कलन
जिल्ला कोष तथा लेखा नियन्त्रक कार्यालयका अनुसार चालु आर्थिक वर्षको पहिलो छ महिनामा रु ५ करोड ६० लाख ३४ हजार राजस्व सङ्कलन भएको छ।
यसमध्ये सङ्घीय कार्यालयहरूबाट रु ४ करोड २८ लाख ७४ हजार र प्रादेशिक कार्यालयहरूबाट रु १ करोड ३१ लाख ५९ हजार राजस्व उठेको छ। सङ्घीयतर्फका १४ कार्यालय र प्रदेशतर्फका नौ कार्यालयले यो राजस्व संकलन गरेका हुन्।
