काठमाडौं । भारतीय महिला क्रिकेट टोलीले इतिहास रच्दै पहिलो पटक महिला एकदिवसीय विश्वकप क्रिकेटको उपाधि जितेको
छ । फाइनल खेलमा भारतले दक्षिण अफ्रिकालाई ५२ रनले पराजित गर्दै ऐतिहासिक सफलता हात पारेको हो ।
भारतले टस जितेर पहिले ब्याटिङ गर्ने निर्णय गरेको थियो । निर्धारित ५० ओभरमा ७ विकेटको क्षतिमा भारतले २९८ रनको चुनौतीपूर्ण योगफल तयार गर्यो । जवाफमा दक्षिण अफ्रिकाले राम्रो सुरुवात गरे पनि भारतीय बलरहरूको अनुशासित प्रदर्शनका अगाडि टिक्न सकेन ।
बलिङतर्फ दीप्ति शर्माले शानदार प्रदर्शन गर्दै ५ विकेट हात पारिन् र जितमा निर्णायक भूमिका खेलेकी थिइन् । उनको घातक बलिङका कारण दक्षिण अफ्रिकाको मध्यक्रम एकपछि अर्को गर्दै ढलेको थियो ।
यो उपाधिसँगै भारतले महिला क्रिकेटमा नयाँ इतिहास रचेको छ । यसअघि भारत दुईपटक फाइनल पुगे पनि उपाधिबाट वञ्चित भएको थियो । प्रधानमन्त्री नरेन्द्र मोदीले सामाजिक सञ्जाल ‘एक्स’ (पूर्व ट्विटर) मार्फत टोलीलाई बधाई दिएका छन् ।
