काठमाडौं: बंगलादेशको भ्रष्टाचार विरोधी आयोग (एसीसी) ले अपदस्थ प्रधानमन्त्री शेख हसिनाविरुद्ध अवैध सम्पत्तिको अनुसन्धान सुरु गरेको छ।
अनुसन्धानको जिम्मेवारी एसीसीका उपनिर्देशक मसुदुर रहमानलाई दिइएको छ। आइतबार उनको नेतृत्वमा एक अनुसन्धान टोली गठन गरिएको एसीसीका एक अधिकारीले जानकारी दिएका छन्।
टोलीले शेख हसिनाको चल तथा अचल सम्पत्तिको विस्तृत छानबिन गर्नेछ। यस क्रममा सम्पत्ति विवरण माग गर्दै सूचना जारी गरिनेछ भने ती सम्पत्तिहरूको तुलना उनको आयकर अभिलेखसँग गरिनेछ।
यसअघि पनि एसीसीले प्लट जालसाजी, मनी लान्ड्रिङ, र विकास परियोजनाका कोषमा अनियमितता सम्बन्धी विभिन्न अनुसन्धानहरू अघि बढाएको थियो।
यही क्रममा ‘पूर्वाचल प्लट ठगी’ प्रकरणमा आरोपपत्र दायर गरेपछि अदालतले शेख हसिनाविरुद्ध पक्राउ पूर्जी जारी गरेको छ।
यसबाहेक, विमानस्थल विकास परियोजनामा भएको कथित भ्रष्टाचारसम्बन्धी अर्को मुद्दा पनि शेख हसिनाविरुद्ध दायर गर्ने तयारी भइरहेको एसीसीले जनाएको छ।
