काठमाडौं । फ्रान्समा गत जुन महिनामा परेको अभूतपूर्व गर्मी (हीटवेभ) का कारण सामान्य अवस्थाको तुलनामा कम्तीमा ५,७६४ जना बढीको मृत्यु भएको सार्वजनिक स्वास्थ्य एजेन्सी ‘पब्लिक हेल्थ फ्रान्स’ले जनाएको छ।
बुधबार सार्वजनिक गरिएको तथ्याङ्कअनुसार जुन १७ देखि जुलाई २ सम्म हीटवेभबाट प्रभावित क्षेत्रहरूमा २१ हजार ६७४ जनाको मृत्यु दर्ता भएको थियो। तर अघिल्ला वर्षका तथ्याङ्क र साङ्ख्यिकीय विश्लेषणका आधारमा सोही अवधिमा हीटवेभ नभएको भए करिब १५ हजार ९१० जनाको मात्र मृत्यु हुने अनुमान गरिएको थियो।
वास्तविक र अनुमानित मृत्युसङ्ख्याबीचको ५,७६४ जनाको अन्तरलाई स्वास्थ्य अधिकारीहरूले अत्यधिक गर्मीका कारण भएको अतिरिक्त मृत्युका रूपमा वर्गीकरण गरेका छन्।
अधिकारीहरूका अनुसार यो तथ्याङ्कमा तातोले प्रत्यक्ष रूपमा ज्यान गुमाएका व्यक्तिमात्र होइन, गर्मीका कारण स्वास्थ्य अवस्था जटिल भई सामान्यभन्दा बढी भएका सबै मृत्यु समावेश छन्। विशेषगरी ज्येष्ठ नागरिक, मुटु तथा फोक्सोका दीर्घरोगी र शारीरिक रूपमा कमजोर व्यक्तिहरू सबैभन्दा बढी प्रभावित भएका छन्।
स्वास्थ्य अधिकारीहरूले थप अनुसन्धानपछि गर्मीका कारण प्रत्यक्ष र अप्रत्यक्ष रूपमा भएको मृत्युको वास्तविक विवरण अझ स्पष्ट हुने बताएका छन्।
यस वर्ष जुन महिनामा फ्रान्सका विभिन्न सहरमा तापक्रमले विगतका धेरै रेकर्ड तोडेको थियो। विशेषगरी जुन २४ र २५ मा केही क्षेत्रमा तापक्रम ४० डिग्री सेल्सियसभन्दा माथि पुगेको थियो। लगातारको उच्च तापक्रमले स्वास्थ्य सेवा, अस्पताल तथा स्थानीय प्रशासनमाथि ठूलो दबाब सिर्जना गरेको थियो।
हीटवेभका बीच स्वास्थ्य मन्त्रालय र स्थानीय प्रशासनले सर्वसाधारणलाई पर्याप्त पानी तथा झोल पदार्थ पिउन, दिउँसोको चर्को घाममा बाहिर ननिस्कन, चिसो स्थानमा बस्न तथा घरमा रहेका वृद्धवृद्धा र बिरामीहरूको विशेष हेरचाह गर्न आग्रह गरेका छन्।
सन् २००३ मा करिब १५ हजार जनाको ज्यान लिएको विनाशकारी हीटवेभ पछि जुन महिनामा देखिएको यो सबैभन्दा घातक गर्मीको प्रभाव भएको स्वास्थ्य अधिकारीहरूले बताएका छन्।
