चितवन: स्वास्थ्य तथा जनसंख्या मन्त्रालयद्वारा सञ्चालित न्यूनतम सेवा मापदण्ड कार्यक्रमअन्तर्गत गरिएको अनुगमन तथा मूल्याङ्कनमा भरतपुर अस्पतालले देशभरका संघीय अस्पतालहरूमध्ये प्रथम स्थान हासिल गरेको छ। अस्पतालले ८८ प्रतिशत अङ्कसहित ‘ग्रिनजोन’ स्टिकर प्राप्त गर्दै देशकै उत्कृष्ट संघीय अस्पताल बन्न सफल भएको हो।
अस्पतालका मेडिकल सुपरिटेन्डेन्ट प्रा. डा. कृष्णप्रसाद पौडेलका अनुसार यो मूल्याङ्कन देशभरका १५ वटा संघीय अस्पतालमा गरिएको थियो। “८५ प्रतिशतभन्दा बढी अङ्क प्राप्त गर्ने अस्पताललाई मात्र दिइने ‘ग्रिनजोन’ स्टिकर यसपटक भरतपुर अस्पताल एकमात्र प्राप्तकर्ता बन्न सफल भएको छ,” उहाँले बताउनुभयो।
अनुगमन तथा मूल्याङ्कनमा सुशासन र व्यवस्थापन, चिकित्सकीय सेवा, फोहरमैला व्यवस्थापन, र अन्य सहयोगी सेवाहरूलाई आधार मानेर मूल्याङ्कन गरिएको हो। अनुगमन टोलीको नेतृत्व मन्त्रालयका प्रवक्ता डा. प्रकाश वुढाथोकीले गर्नुभएको थियो।
डा. पौडेलले अस्पतालले गुणस्तरीय सेवा प्रवाहमा निरन्तर सुधार गर्दै आएको बताउँदै भन्नुभयो, “अस्पतालको सम्पूर्ण टिम सेवा सुधारमा समर्पित छ, जसको परिणामस्वरूप यो उपलब्धि हासिल भएको हो।”
सूचना अधिकारी गोपाल पौडेलका अनुसार अस्पतालले विगत केही वर्षयता निरन्तर रूपमा आफ्नो मूल्याङ्कन अङ्क सुधार गर्दै आएको छ। उनका अनुसार:
२०७८ सालमा: ५२ प्रतिशत
२०७९ मा: ६२ प्रतिशत
२०८० मा: ६४ प्रतिशत
२०८१ मा: ७७ प्रतिशत
२०८२ मा: ८८ प्रतिशत
यस उपलब्धिले भरतपुर अस्पतालको सेवा, व्यवस्थापन र समर्पणलाई थप पुष्टि गरेको छ।
