काठमाडौं: नेपाली नागरिकलाई नक्कली भुटानी शरणार्थी बनाएर अमेरिका पठाउने गिरोहमा संलग्न आरोपमा पक्राउ परेका बेचन झालाई अदालतले पुर्पक्षका लागि थुनामा पठाउन आदेश दिएको छ।
आइतबार काठमाडौं जिल्ला अदालतका न्यायाधीश तीर्थराज केसीको एकल इजलासले झालाई यस्तो आदेश दिएको हो।
झालाई राजनीतिको माथिल्लो ‘नेक्सस’का रुपमा राखेर प्रहरीले अनुसन्धान गरिरहेको थियो। उनलाई प्रहरीको विशेष ब्युरोको टोलीले भारतबाटै पक्राउ गरेर नेपाल ल्याएको थियो।
उनीविरुद्ध कीर्ते, राज्यविरुद्धको अपराध र संगठित अपराधमा मुद्दा दायर गरिएको थियो। जिल्ला अदालतको थुनामा पठाउने आदेशपछि उनलाई केन्द्रीय कारागार सुनधारा चलान गरिएको छ।
