काठमाडौं । अगस्ट २०२३ देखि जेलमा रहेका इमरान खानको स्वास्थ्य अवस्थाप्रति चिन्ता व्यक्त गर्दै पाँच देशका १४ पूर्व अन्तर्राष्ट्रिय क्रिकेट कप्तानहरूले पाकिस्तान सरकारलाई पत्र पठाएका छन्।
हिन्दुस्तान टाइम्सका अनुसार सुनील गावस्कर, कपिल देव, ग्रेग च्यापेल, बेलिन्डा क्लार्क, माइकल एथर्टन, नासेर हुसेन, इयान च्यापेल, एलन बोर्डर, माइकल ब्रेअरली, डेभिड गोवर, किम ह्युजेस, क्लाइभ लोयड, स्टिभ वा र जोन राइटसहितका पूर्व कप्तानहरूले पाकिस्तानका प्रधानमन्त्री शाहबाज शरीफलाई पत्र लेख्दै इमरान खानलाई उचित स्वास्थ्य उपचार उपलब्ध गराउन आग्रह गरेका छन्।
रिपोर्टअनुसार उक्त पत्रमा कुनै पनि पूर्व पाकिस्तानी कप्तानले हस्ताक्षर गरेका छैनन्। यद्यपि, गत साता वसीम अक्रम, वकार युनिस र शाहिद अफ्रिदी लगायतका पूर्व पाकिस्तानी क्रिकेटरहरूले सन् १९९२ को विश्वकप विजेता टोलीका कप्तान इमरान खानप्रति उचित व्यवहार गर्न सामाजिक सञ्जालमार्फत आवाज उठाएका थिए।
पाकिस्तानी सर्वोच्च अदालतको निर्देशनमा गरिएको अनुसन्धानअनुसार क्रिकेटरबाट राजनीतिज्ञ बनेका इमरान खानले एउटा आँखाको करिब ८५ प्रतिशत दृष्टि गुमाएको उल्लेख गरिएको छ। अदालतद्वारा नियुक्त वकिल सलमान सफदरको प्रतिवेदनमा इमरानले लामो समयदेखि धमिलो दृष्टिको समस्या भएको गुनासो गर्दै आएका थिए।
प्रतिवेदनअनुसार अक्टोबर २०२५ सम्म उनको दृष्टि सामान्य रहेको तर त्यसपछि अचानक दाहिने आँखाको दृष्टि गुम्न थालेको बताइएको छ। परीक्षणका लागि पिम्स अस्पतालका आँखा विशेषज्ञ बोलाइएका थिए, जहाँ चिकित्सकहरूले आँखामा रगत जमेको पत्ता लगाएका थिए, जसका कारण गम्भीर क्षति भएको उल्लेख गरिएको छ।
उपचार तथा औषधि प्रयोगपछि पनि उनको दाहिने आँखामा हाल करिब १५ प्रतिशत मात्र दृष्टि रहेको जनाइएको छ। इमरान खानले भने आफूलाई निजी चिकित्सकबाट उपचार गराउने अनुमति नदिइएको दाबी गरेका छन्।
