काठमाडौँ: अख्तियार दुरुपयोग अनुसन्धान आयोगले जलस्रोत तथा सिँचाइ विभागका तत्कालीन इञ्जिनियर विष्णुकुमार श्रेष्ठविरुद्ध अकूत सम्पत्ति आर्जनको आरोपमा विशेष अदालतमा मुद्दा दायर गरेको छ।
आयोगका अनुसार, श्रेष्ठको सरकारी सेवामा प्रवेशपछि आर्जन गरिएको सम्पत्तिको विस्तृत अध्ययन गरिएको थियो। इञ्जिनियर श्रेष्ठ २०४६ असार ३० गते सरकारी सेवामा प्रवेश गरेका थिए, र २०७७ असार ३१ सम्मको सम्पत्तिको विवरणको छानबिन गरिएको हो।
छानबिनमा, वैधानिक रुपमा श्रेष्ठले रु ११ करोड २५ लाख ६५ हजार ११९ बराबरको आय गरेको देखिएको छ। तर, उनले रु १६ करोड १३ लाख ९५ हजार ५२८ बराबरको लगानी र खर्च गरेको पाइयो। आयोगले रु ४ करोड ८८ लाख ३० हजार ३२९ बराबरको रकमको वैधानिक स्रोत नदेखिएको बताएको छ।
आयोगका अनुसार, श्रेष्ठले आफ्नो पदीय हैसियतको दुरुपयोग गर्दै गैरकानुनी रुपमा सम्पत्ति आर्जन गरेका छन्। उनले अस्वाभाविक जीवनशैली अपनाएको पनि पुष्टि भएको छ।
गैरकानुनी रुपमा आर्जित सम्पत्तिलाई श्रेष्ठले आफ्नी पत्नी लक्ष्मीकुमारी श्रेष्ठ, बाबु हरिकुमार श्रेष्ठ, आमा इन्द्रकमारी श्रेष्ठ र छोरा विवेक श्रेष्ठको नाममा राखेको पाइएको छ। त्यसैले, उनीहरूलाई पनि प्रतिवादी बनाई आइतबार विशेष अदालतमा मुद्दा दायर गरिएको आयोगका प्रवक्ता नरहरि घिमिरेले जानकारी दिनुभयो।
अख्तियारले गैरकानुनी रुपमा आर्जन गरेको सम्पत्ति जफत गर्नुपर्ने र रु ४ करोड ८८ लाख ३० हजार ३२९ बराबरको बिगो असूल गर्नुपर्ने मागदाबी गर्दै मुद्दा दायर गरेको छ।
