काठमाडौं । पाकिस्तानी टेलिभिजन एन्कर राबिया एहसानको गोली लागेर मृत्यु भएको घटनामा उनका पतिलाई दुई दिनको प्रहरी हिरासतमा पठाइएको छ । यसैबीच, सुरुमा पतिविरुद्ध हत्या आरोपमा जाहेरी दिएका राबियाका परिवारले भने घटना दुर्घटना भएको निष्कर्षसहित मुद्दा फिर्ता लिने निर्णय गरेको छ ।

प्रहरीका अनुसार, गत ८ नोभेम्बरमा पाकिस्तानको पञ्जाब प्रान्तस्थित रावलपिंडीको गुलशनाबाद क्षेत्रमा आफ्नै घरको कोठामा राबिया मृत अवस्थामा फेला परेकी थिइन् । उनको घाँटीको तल्लो भागमा गोली लागेको थियो ।

राबियाका भाइ खुर्रम अहमदको उजुरीका आधारमा उनका पतिविरुद्ध पाकिस्तानी दण्ड संहिताको धारा ३०२ अन्तर्गत हत्याको मुद्दा दर्ता गरिएको थियो । प्रहरीले घटनास्थलबाट एउटा पेस्तोलसमेत बरामद गरेको थियो ।

पञ्जाबकी सूचना मन्त्री अजमा बुखारीका अनुसार, अनुसन्धानका क्रममा राबियाका पतिले पेस्तोलबाट दुर्घटनावश गोली चलेको बयान दिएका थिए ।

प्रहरीले पक्राउ परेका पतिलाई सोमबार सम्बन्धित अदालतमा उपस्थित गराएको थियो । अनुसन्धानका लागि थप हिरासत माग गरेपछि अदालतले दुई दिनको प्रहरी हिरासतमा राख्न अनुमति दिएको हो । यसैबीच, राबियाको नमाज-ए-जनाजा जामिया मस्जिद गुलशनाबादमा सम्पन्न भएको छ ।

परिवारले दुर्घटना भएको दाबी गर्‍यो

राबियाका भाइ तथा जाहेरकर्ता खुर्रम अहमदले बीबीसीसँग कुरा गर्दै आफू, आमा र बहिनीले उनको मृत्यु दुर्घटनावश भएको निष्कर्ष निकालेको बताएका छन् ।

घटनाका बेला आफू घरमा उपस्थित नभए पनि उनकी आमा र बहिनी घरमै रहेको उनले बताए । घरमा काम गर्ने एक कर्मचारी पनि घटनास्थलमा रहेको उनको भनाइ छ ।

खुर्रमका अनुसार, उनका ज्वाइँले दराजबाट लुगा निकाल्ने क्रममा त्यहाँ राखिएको पेस्तोल हातमा लिएका थिए । त्यही क्रममा अचानक गोली चल्दा राबियाको घाँटीमा लागेको र उनको घटनास्थलमै मृत्यु भएको उनले बताएका छन् ।

घटनाबारे जानकारी पाएर घर पुग्दा आमा र बहिनीले पति-पत्नीबीच कुनै विवाद वा झगडा नभएको जानकारी दिएको पनि खुर्रमले बताए ।

उनले आफ्ना ज्वाइँलाई राम्रोसँग चिनेको र उनी इज्जतदार व्यक्ति भएको दाबी गरेका छन् । उनका अनुसार, राबियाका पति ओभरसिज पाकिस्तानिज फाउन्डेसनमा डेपुटी डाइरेक्टरका रूपमा कार्यरत थिए ।

प्रहरीले हत्याको कोणबाट पनि अनुसन्धान गर्ने

प्रहरीका अनुसार, राबिया र उनका पतिबीच विवाह भएको १४ वर्ष भइसकेको थियो । उनीहरूका दुई छोरी छन् । प्रारम्भिक अनुसन्धानमा परिवारका सदस्यहरूले पति-पत्नीबीच कुनै मतभेद वा घरेलु हिंसा भएको जानकारी नदिएको प्रहरीले जनाएको छ ।

प्रहरीको प्रारम्भिक अनुसन्धानअनुसार, मौसम परिवर्तन भएपछि दराजमा गर्मीका लुगाको सट्टा जाडोका लुगा राख्ने क्रममा लुगाबीच ३० बोरको पेस्तोल भेटिएको थियो । घरमा उपस्थित घरेलु कर्मचारीको प्रारम्भिक बयानअनुसार गोली चल्दा राबियाका पति पेस्तोल समातिरहेका थिए ।

यद्यपि, परिवारले घटनालाई दुर्घटना भने पनि प्रहरीले हत्याको कोणबाट अनुसन्धान जारी राख्ने जनाएको छ । घटनाका सबै सम्भावित कारण र परिस्थितिको निष्पक्ष छानबिन गरिने प्रहरीको भनाइ छ ।

प्रारम्भिक पोस्टमार्टम रिपोर्टअनुसार, राबियाको घाँटीको अगाडिको तल्लो भागमा गोली लागेको थियो । घटनास्थलबाट बरामद गरिएको ३० बोरको पेस्तोलको इजाजतपत्र नरहेको प्रहरीले जनाएको छ ।

घटनास्थलबाट संकलन गरिएका फरेन्सिक प्रमाण तथा नमुना परीक्षणका लागि प्रयोगशालामा पठाइएको छ । फरेन्सिक रिपोर्ट, पोस्टमार्टम निष्कर्ष र अन्य प्रमाणका आधारमा थप कानुनी प्रक्रिया अघि बढाइने प्रहरीले जनाएको छ ।

४१ वर्षीया राबिया टेलिभिजन कार्यक्रम प्रस्तोता थिइन्

४१ वर्षीया राबिया एहसान पाकिस्तानी टेलिभिजन च्यानल ९२ सँग आबद्ध थिइन् । उनले पत्रकार आमिर मतिनसँगै ‘मुकाबिल’ नामक कार्यक्रम सञ्चालन गर्दै आएकी थिइन् ।

च्यानल ९२ का संवाददाता साजिद शेखका अनुसार, राबियाले आफ्नो कार्यक्रम सञ्चालन गरिरहेकी थिइन् । उनी दुई छोरीकी आमा पनि थिइन् ।

पत्रकार फरिहा इद्रिसले सामाजिक सञ्जाल एक्समार्फत राबियाको निधनप्रति दुःख व्यक्त गरेकी छन् । उनले राबियालाई सक्षम कार्यक्रम प्रस्तोता, साथी र दुई सन्तानकी आमा भन्दै उनको परिवारप्रति समवेदना प्रकट गरेकी छन् ।

त्यस्तै, पत्रकार जेब अल-निसा बुर्कीले आफ्नै घरमा महिलाको हत्या भएको घटनाप्रति चिन्ता व्यक्त गरेकी छन् ।

राबियाको मृत्युको वास्तविक कारणबारे प्रहरी अनुसन्धान जारी रहेकाले फरेन्सिक परीक्षण र अन्य प्रमाणको निष्कर्षपछि मात्रै घटनाको यथार्थ खुल्ने अपेक्षा गरिएको छ ।