भद्रपुर (झापा): यातायात व्यवस्था कार्यालय झापाले चालु आर्थिक वर्ष २०८१/८२ को नौ महिनामा कुल रु ८२ करोड १६ लाख ४८ हजार ४०२ राजस्व संकलन गरेको छ।
कार्यालयले केवल चैत महिनामात्रै रु १५ करोड ७० लाख ८२ हजार ११६ राजस्व उठाएको जानकारी दिएको छ।
कार्यालय प्रमुख प्रेमप्रसाद सापकोटाका अनुसार, चैत महिनासम्म सवारी साधनको करबाट रु ६९ करोड ६ लाख २२ हजार ५४२, यातायात क्षेत्रको आम्दानीबाट रु ९६ लाख ६० हजार ६६७ र सवारी चालक अनुमतिपत्र तथा सवारी दर्ता किताबसम्बन्धी दस्तुरबाट रु १२ करोड १२ लाख ८९ हजार ६५१ राजस्व संकलन भएको हो।
चालु आवको नौ महिनामा मात्रै झापा जिल्लामा ९,९५४ नयाँ सवारी साधन दर्ता भएका छन्। कार्यालयका अनुसार, गत आव २०८०/८१ को अन्त्यसम्ममा जिल्लामा कूल २,०६,८८४ सवारी साधन दर्ता भएका थिए।
नयाँ दर्ता भएकामध्ये सबैभन्दा धेरै मोटरसाइकल छन् — कुल ३,२३६। त्यसपछि, ई–रिक्सा २,५४९, स्कुटर २,३४५, ई–स्कुटर ५७९, कार १८०, ट्र्याक्टर १७६, जिप १६८, बस १०८, ई–कार ९३, ट्रक ५२, ट्रिपर २०, माइक्रोबस १९ र एम्बुलेन्स ४ वटा दर्ता भएका छन्।
