काठमाडौँ । नेपाल टेलिकमले डाटा प्याकेजसम्बन्धी सेवामा सुधार गर्दै प्याकेज सकिएपछि स्वतः मोबाइल ब्यालेन्स कट्ने व्यवस्था अन्त्य गरेको छ।
सञ्चार तथा सूचना प्रविधि मन्त्रालयका अनुसार अब ग्राहकको डाटा प्याकेज ९० प्रतिशत खपत भएपछि एसएमएस तथा मोबाइल एपमार्फत पूर्वसूचना पठाइनेछ। त्यसपछि ग्राहकलाई आवश्यकताअनुसार प्याकेज पुनः नवीकरण गर्न अनुरोध गरिने व्यवस्था लागू गरिएको छ।
यसअघि डाटा प्याकेज सकिएलगत्तै स्वतः मुख्य ब्यालेन्सबाट रकम कट्ने गुनासो बढेपछि मन्त्रालयले उक्त व्यवस्था हटाउने निर्णय गरेको हो। नयाँ व्यवस्थाअनुसार ग्राहकले चाहेमा मात्र ‘पे एज यू गो’ प्रणाली प्रयोग गर्न सक्नेछन्।
यो प्रणाली प्रयोग गर्न इच्छुक ग्राहकले *444# डायल गरी सेवा सक्रिय वा निष्क्रिय गर्न सक्ने व्यवस्था गरिएको मन्त्रालयले जनाएको छ।
