काठमाडौं । अमेरिकी राष्ट्रपति डोनाल्ड ट्रम्पले मिडटर्म निर्वाचनमा रिपब्लिकन पार्टीले हार व्यहोरेपछि ह्वाइट हाउसको चिफ अफ स्टाफ पदमा स्टेफन मिलरलाई नियुक्त गर्ने तयारी गरेका छन्।
मिलर ट्रम्पको कडा आप्रवासन नीतिका प्रमुख योजनाकारमध्ये एक हुन्। उनको नियुक्तिसँगै सुजी वाइल्सको स्थानमा नयाँ व्यक्तिले ह्वाइट हाउसको यो महत्त्वपूर्ण जिम्मेवारी सम्हाल्नेछन्।
रिपब्लिकन पार्टीले कंग्रेसका दुवै सदनमा नियन्त्रण गुमाएपछि वाइल्सले पदबाट राजीनामा दिएकी थिइन्। यस हारले ट्रम्पको कार्यकालको अन्तिम दुई वर्षको राजनीतिक एजेन्डामा समेत धक्का पुर्याएको छ।
पत्रकारहरूसँग कुरा गर्दै ट्रम्पले वाइल्सले आफ्नो जिम्मेवारी राम्रोसँग पूरा गरेको बताएका थिए। उनले भने, ‘वाइल्सले धेरै राम्रो काम गरेकी छिन्, तर कहिलेकाहीँ हामीले परिवर्तन गर्नुपर्छ।’
ट्रम्पका निकट सहयोगी तथा डेपुटी चिफ अफ स्टाफ मिलरले सोमबारदेखि नयाँ जिम्मेवारी सम्हाल्ने बताइएको छ। ४१ वर्षीय मिलरले ट्रम्पको पहिलो कार्यकालमा पनि वरिष्ठ सल्लाहकारका रूपमा काम गरेका थिए।
सन् २०२० को राष्ट्रपति निर्वाचनमा ट्रम्पले पराजय व्यहोरेपछि पनि उनको साथ नछाड्ने सीमित सहयोगीमध्ये मिलर एक थिए। गत वर्ष ट्रम्प पुनः सत्तामा फर्किएपछि उनी फेरि ट्रम्पको टिममा सक्रिय भएका हुन्।
सामाजिक सञ्जाल एक्समा मिलरले ट्रम्पलाई ‘अमेरिकी इतिहासमा सबैभन्दा ठूलो परिवर्तन ल्याउने राजनीतिक नेता’ भन्दै प्रशंसा गरेका छन्। ट्रम्पले एक्लै अमेरिकालाई देश बर्बाद पार्न चाहने शक्तिहरूबाट बचाएको उनको दाबी छ।