रियाद । यमनका हुथी विद्रोहीहरूले साउदी अरेबियाका तेल पूर्वाधारलाई लक्षित गरी आक्रमण तीव्र पारेका छन् । आक्रमणका कारण साउदी अरेबियाको धाह्रानस्थित साउदी अरामकोको भवनमा सामान्य आगलागी भएको ऊर्जा मन्त्रालयले जनाएको छ ।
मन्त्रालयका अनुसार घटनामा कुनै मानवीय क्षति भएको छैन । तेल पूर्वाधार र सुरक्षा क्षेत्रबाट टाढा रहन नागरिकलाई चेतावनी दिइए पनि हुथी विद्रोहीले साउदी पूर्वाधारमाथि आक्रमण जारी राखेका छन् ।
यसको जवाफमा साउदी नेतृत्वको गठबन्धनले यमनमा हुथीहरूको नियन्त्रणमा रहेका ऊर्जा टर्मिनल र इन्धन भण्डारण केन्द्रलाई लक्षित गरी हवाई आक्रमण तीव्र पारेको छ । गठबन्धन सेनाका प्रवक्ता तुर्की अल-मालिकीले सैन्य कारबाहीका क्रममा नागरिकमाथि हुन सक्ने क्षति रोक्न आवश्यक सावधानी अपनाइएको बताएका छन् ।
अमेरिकी राष्ट्रपति डोनाल्ड ट्रम्पले आगामी मध्यावधि निर्वाचनलाई ध्यानमा राख्दै ऊर्जाको मूल्य बढाउने उद्देश्यले हुथी विद्रोहीले साउदी पूर्वाधारमाथि आक्रमण बढाएको बताएका छन् ।
यसैबीच, मध्यपूर्वमा कूटनीतिक प्रयास पनि अघि बढेको जनाइएको छ । इरानको विदेश मन्त्रालयका अनुसार हर्मुज जलडमरूमध्यमा व्यावसायिक जहाजको सुरक्षित आवागमन सुनिश्चित गर्न इरान र ओमानबीच अस्थायी सुरक्षित जलमार्ग स्थापना गर्ने विषयमा समझदारी बनेको छ ।
मध्यपूर्वमा जारी द्वन्द्व र क्षेत्रीय तनावले सुरक्षा अवस्था थप जटिल बनाउनुका साथै विश्वव्यापी ऊर्जा आपूर्ति र इन्धनको मूल्यमा समेत असर पार्न सक्ने चिन्ता बढाएको छ ।