रियाद । यमनको अन्तरिम राजधानी अदनस्थित अल–माशिक राष्ट्रपति भवन परिसरलाई लक्षित गरी हुथी विद्रोहीले गरेको क्षेप्यास्त्र आक्रमणमा कम्तीमा पाँच जनाको मृत्यु भएको छ भने १६ जना घाइते भएका छन्। मृतकमा यमनी प्रधानमन्त्रीका दुई सुरक्षागार्डसमेत रहेको स्वास्थ्य मन्त्रीलाई उद्धृत गर्दै अलजजिराले जनाएको छ।
रोयटर्सका अनुसार आक्रमणका बेला प्रधानमन्त्री र मन्त्रिपरिषद्का अन्य उच्च अधिकारी भवनभित्रै थिए। उनीहरू सकुशल रहेको सरकारी अधिकारीहरूले जनाएका छन्। प्रत्यक्षदर्शीका अनुसार आक्रमणपछि परिसर आसपास कम्तीमा पाँचवटा शक्तिशाली विस्फोटका आवाज सुनिएका थिए भने ठूलो मात्रामा धुवाँ देखिएको थियो।
हुथी समूहका सैन्य प्रवक्ता याह्या सरीले आक्रमणको जिम्मेवारी लिँदै अदनस्थित साउदी अरबको सैन्य परिचालन मुख्यालयलाई निशाना बनाइएको दाबी गरेका छन्। उनले साउदी सेनाको उपस्थिति र सैन्य गतिविधि भएका स्थानलाई लक्षित गर्ने नीतिअनुसार आक्रमण गरिएको बताएका छन्।
यसैबीच, साउदी अरबले हुथी समूहका पछिल्ला आक्रमणको निन्दा गर्दै तिनलाई ‘पूर्ण युद्ध अपराध’ को संज्ञा दिएको छ। साउदी सरकारले आक्रमणले मुस्लिम समुदायका पवित्र धार्मिक स्थल र तीर्थयात्रीहरूको सुरक्षामा समेत गम्भीर जोखिम उत्पन्न गरेको आरोप लगाएको छ।
सरकारी सुरक्षा बललाई साउदी नेतृत्वको गठबन्धनले निरन्तर सहयोग गर्दै आएपछि हुथी समूहले साउदी अरबका विमानस्थल, बन्दरगाह तथा तेल प्रशोधन केन्द्रहरूमा ड्रोन र क्षेप्यास्त्र आक्रमण तीव्र पारेको जनाइएको छ।
साउदी गठबन्धनका प्रवक्ता तुर्की अल–मलिकीले यसै महिनामा रियादस्थित किङ खालिद अन्तर्राष्ट्रिय विमानस्थलमा भएका आक्रमणमा १७ जनाको मृत्यु र ३३३ जना घाइते भएको दाबी गरेका छन्। त्यस्तै, दक्षिणपश्चिम साउदी अरबको आभा विमानस्थलमा भएका आक्रमणमा तीन जनाको मृत्यु र २८ जना घाइते भएको उनले बताएका छन्।
अल–मलिकीले हुथी समूहले बाह्य सहयोगमा ब्यालिस्टिक क्षेप्यास्त्र, ड्रोन तथा विस्फोटक डुङ्गाजस्ता आधुनिक हतियार र प्रविधि प्राप्त गरिरहेको आरोप लगाएका छन्। साउदी सेनाले भने यमनका पहाडी क्षेत्रमा रहेका हुथीका १२७ वटा हतियार भण्डारण तथा क्षेप्यास्त्र प्रक्षेपण केन्द्र नष्ट गरेको दाबी गरेको छ।
हुथी सैन्य प्रवक्ता सरीले मक्का र मदिनाको हवाई क्षेत्रबाहेक साउदी अरबका अन्य विमानस्थल तथा हवाई क्षेत्र असुरक्षित रहेको चेतावनी दिएका छन्। त्यसपछि साउदी अरबस्थित अमेरिकी दूतावासले सम्भावित आक्रमणको जोखिम औँल्याउँदै आफ्ना कर्मचारीको यात्रामा प्रतिबन्ध लगाएको छ।
बढ्दो सुरक्षा जोखिमका कारण हवाई सेवा पनि प्रभावित भएको छ। इत्तेहाद एयरवेजले अबुधाबीबाट रियाद जाने उडान अक्टोबर १९ सम्म रद्द गरेको छ भने दमाम र जेद्दाहका उडानमा समेत असर परेको छ। कतार एयरवेजले पनि रियाद र दमाम जाने तथा त्यहाँबाट फर्कने उडान अस्थायी रूपमा स्थगित गरेको जनाएको छ।
यसैबीच, समुद्री सुरक्षा अनुगमन निकाय यूकेएमटीओले हर्मुज जलडमरूमध्य क्षेत्रमा ‘गम्भीर’ चेतावनी कायम राखेको छ। उक्त क्षेत्रमा इरानी आक्रमण तथा ड्रोन गतिविधिको जोखिम रहेकाले व्यापारिक र समुद्री जहाजलाई उच्च सतर्कता अपनाउन आग्रह गरिएको छ।
यमनमा सन् २०१४ मा हुथी विद्रोहीले राजधानी साना कब्जा गरेपछि द्वन्द्व चर्किएको थियो। त्यसपछि अदनलाई अन्तरिम राजधानी बनाइएको हो। सन् २०१५ मा साउदी नेतृत्वको गठबन्धनले अन्तर्राष्ट्रिय मान्यता प्राप्त यमनी सरकारको समर्थनमा सैन्य हस्तक्षेप गरेको थियो।
सन् २०२२ मा संयुक्त राष्ट्रसङ्घको मध्यस्थतामा छ महिनाको औपचारिक युद्धविराम भए पनि द्वन्द्वको स्थायी राजनीतिक समाधान हुन सकेको छैन। पछिल्लो अदन आक्रमण र साउदी अरबमाथिका आक्रमणले खाडी क्षेत्रमा सुरक्षा तनाव थप बढाएको छ।