काठमाडौं । इरानको राजधानी तेहरानका एक पसल सञ्चालक आफ्नो अनुहार इजरायलका प्रधानमन्त्री बेन्जामिन नेतन्याहूसँग मिल्दोजुल्दो देखिएपछि सामाजिक सञ्जालमा चर्चामा आएका छन्। भाइरल भिडियोमा ती पसल सञ्चालक नेतन्याहूजस्तै देखिएपछि उनको तस्बिर र भिडियो सामाजिक सञ्जालमा व्यापक रूपमा साझा भइरहेका छन्। सुरुमा मनोरञ्जन र ठट्टाको विषय बनेको यो घटना अहिले विवादमा परिणत भएको छ।
इरानको ‘अजरन्युज’ को रिपोर्टअनुसार ती व्यक्ति तेहरानमा ड्राइ फ्रुट्स, बदाम तथा मिठाईको व्यापार गर्छन्। भाइरल भिडियोमा उनी आफ्नो पसलभित्र तराजु पछाडि बसेको देखिन्छन्। सामाजिक सञ्जाल प्रयोगकर्ताहरूले उनको अनुहार, कपालको बनोट र हाउभाउ नेतन्याहूसँग मिल्दोजुल्दो रहेको टिप्पणी गरेका छन्। त्यसपछि धेरैले ती पसल सञ्चालकको पहिचान र पसलको ठेगाना पत्ता लगाउने प्रयाससमेत गरेका छन्।
सुरुमा भिडियो सामाजिक सञ्जालमा हाँसो र मनोरञ्जनको विषय बने पनि पछि विवाद चर्किएको हो। टर्कीका सञ्चारमाध्यममा प्रकाशित खबरअनुसार केही सामाजिक सञ्जाल प्रयोगकर्ताहरूले नेतन्याहूसँग अनुहार मिलेकै कारण ती पसल सञ्चालकको पसल बहिष्कार गर्न अपिल गरेका छन्। केही रिपोर्टमा अनलाइन विवादको असर उनको व्यवसायमा समेत परेको र उनी अनावश्यक प्रचारप्रसारका कारण समस्यामा परेको दाबी गरिएको छ।
यद्यपि, यी दाबीहरूको स्वतन्त्र रूपमा पुष्टि हुन सकेको छैन। पसल सञ्चालकको वास्तविक पहिचान, पसलको ठेगाना र भिडियो रेकर्ड गरिएको समयबारे पनि आधिकारिक जानकारी सार्वजनिक भएको छैन। भिडियोको मूल स्रोतसमेत स्पष्ट छैन।
इरान र इजरायलबीच लामो समयदेखि राजनीतिक तथा सैन्य तनाव कायम रहँदै आएको छ। दुई देशबीचको द्वन्द्वले आम नागरिकमा समेत एकअर्काप्रतिको संवेदनशीलता र नकारात्मक धारणा बढाएको छ।
सामान्यतया कुनै सर्वसाधारणको अनुहार चर्चित व्यक्तिसँग मिल्नु सामाजिक सञ्जालमा मनोरञ्जनको विषय बन्ने गर्छ। तर यस घटनामा अनुहार मिलेकै आधारमा व्यवसाय बहिष्कार गर्न गरिएको अपिलले व्यक्तिगत पहिचान र राजनीतिक पूर्वाग्रहबीचको सीमाबारे प्रश्न उठाएको छ।