काठमाडौं । अभिनेता टाइगर श्राफमाथि भएको गोली प्रहारको घटनामा दिल्ली प्रहरीको स्पेशल सेलले दुई महिलासहित थप चार जनालाई पक्राउ गरेको छ। यससँगै घटनामा पक्राउ पर्नेको सङ्ख्या सात पुगेको छ।
राजस्थानको कोटाबाट पक्राउ परेका तीन अभियुक्तलाई मुम्बई क्राइम ब्रान्चको टोलीले बुधबार मुम्बई ल्याएको छ। प्रहरीले दिल्ली र सोनीपतबाट पक्राउ परेका थप चार जनामाथि मुम्बईमा हतियार आपूर्ति गरेको आरोपमा अनुसन्धान गरिरहेको छ।
दिल्ली प्रहरी स्पेशल सेलका डीसीपी प्रवीण त्रिपाठीका अनुसार पक्राउ पर्नेमा राधा, बबीता, सुमित र कुणाल नामका व्यक्ति छन्। तीमध्ये कुणाल हालै अर्को मुद्दामा जेलबाट रिहा भएका थिए। त्यसपछि उनी अनिल पण्डितको निर्देशनमा सुमितसँगै हतियार लिन अमृतसर गएको प्रहरीको दाबी छ।
पत्रकारहरूसँग कुरा गर्दै डीसीपी त्रिपाठीले कुणालले अमृतसरबाट हतियार प्राप्त गरेपछि राधाको सहयोगमा ती हतियार मुम्बई पुर्याएको बताए। उनका अनुसार राधा र बबीताले मुम्बईको दादर रेल्वे स्टेसननजिकै एक नाबालिग किशोरलाई हतियार हस्तान्तरण गरेका थिए।
प्रहरीका अनुसार कुणालले राधासँगको व्यक्तिगत सम्बन्धको फाइदा उठाउँदै उनलाई हतियार ओसारपसारमा संलग्न गराएका थिए। उनीहरू दुवै जना रेलमार्फत हतियार बोकेर मुम्बई पुगेका थिए।
डीसीपी त्रिपाठीले कुणाल इन्क्रिप्टेड सञ्चार माध्यममार्फत अनिल पण्डितको सम्पर्कमा रहेको र सामाजिक सञ्जालबाट प्राप्त निर्देशनअनुसार काम गरेको दाबी गरे। उनका अनुसार यसअघि पनि अनिल पण्डितकै निर्देशनमा कुणालले पानीपतमा गोली प्रहारको घटना गराएको थियो।
प्रहरीका अनुसार हतियार कहाँबाट लिने, कसरी मुम्बई पुर्याउने र कसलाई बुझाउने भन्ने निर्देशन उनीहरूलाई सञ्चार माध्यममार्फत दिइएको थियो।
यस घटनासँग सम्बन्धित एउटा अडियो सार्वजनिक भएको छ, जसमा कथित रूपमा अनिल पण्डितले बलिउड अभिनेतामाथि भएको घटनाको जिम्मेवारी लिएको सुनिन्छ। यद्यपि, बीबीसीले उक्त अडियोको पुष्टि गरेको छैन।
अन्य सेलिब्रेटी पनि उनीहरूको निशानामा थिए कि भन्ने प्रश्नमा डीसीपी त्रिपाठीले हालसम्मको सोधपुछबाट त्यस्तो तथ्य फेला नपरेको बताए। उनका अनुसार पक्राउ परेका व्यक्तिहरू मुख्यतः हतियार आपूर्ति गर्ने सञ्जालका सदस्य हुन् र उनीहरूलाई हतियार कहाँबाट ल्याउने तथा कहाँ पुर्याउने भन्ने जानकारी मात्र दिइएको थियो।
डीसीपी त्रिपाठीका अनुसार अनिल पण्डित र ह्यारी बक्सर रनदीप मलिक ग्याङका सदस्य हुन्। फिरौतीका लागि फोन गर्ने तथा गोली प्रहारका घटनामा उक्त समूहको नाम जोडिँदै आएको उनले बताए।
प्रहरीको प्रारम्भिक अनुसन्धानअनुसार हतियार ओसारपसारमा सहयोग गरेबापत कुणालले ७० देखि ८० हजार रुपैयाँ पाएका थिए। त्यसमध्ये करिब १० देखि १२ हजार रुपैयाँ बबीतालाई दिइएको प्रहरीको दाबी छ। कुणाल र सुमित सोनीपतका बासिन्दा हुन् भने राधा र बबीता उत्तर प्रदेशका भए पनि हाल सोनीपतमा बस्दै आएका थिए।
प्रहरीका अनुसार उनीहरू पछिल्लो दुईदेखि तीन साताको अवधिमा मात्रै यो कामका लागि एकअर्काको सम्पर्कमा आएका थिए। उनीहरू १५ तारिखमा सोनीपतबाट हिँडेर १७ तारिख बिहान मुम्बई पुगेका थिए। सोही दिन बिहान करिब ११ बजे दादर रेल्वे स्टेसननजिकै एक नाबालिग किशोरलाई हतियार बुझाइएको प्रहरीको भनाइ छ।
यसअघि पक्राउ परेका तीन अभियुक्तमध्ये रेहान पनि एक हुन्। हरियाणामा बस्ने रेहानकी आमाले प्रहरीसँगको सोधपुछपछि सञ्चारमाध्यमसँग कुरा गर्दै आफ्नो छोरा २० देखि २२ दिनदेखि बेपत्ता रहेको र परिवारले उसको खोजी गरिरहेको बताएकी छन्।
उनका अनुसार प्रहरीले रेहान मुम्बई कसरी पुगेको थियो र कसैले उसलाई बहकाएको थियो कि थिएन भन्ने विषयमा सोधपुछ गरेको थियो। उनले छोरासँग भाडा तिर्ने पैसासमेत नभएको बताएको उल्लेख गरिन्।
यसैबीच, अनुसन्धानका क्रममा सोनीपत प्रहरीले रेहानका बाल्यकालका एक साथीलाई पनि हिरासतमा लिएको छ। समाचार संस्था आईएएनएसका अनुसार ती युवकका परिवारले भने उनी कुनै षड्यन्त्रमा संलग्न नरहेको दाबी गरेका छन्।
हिरासतमा लिइएका युवककी आमाले आफ्नो छोरा निर्दोष रहेको र रेहानसँग बाल्यकालदेखिको मित्रता भए पनि पछिल्लो समय उनीहरूबीच सम्पर्क नरहेको बताइन्। उनका अनुसार छोरा मिर्गौलासम्बन्धी समस्याबाट पीडित छन् र नियमित औषधि सेवन गरिरहेका छन्। प्रहरीले उनीबाट कुनै पनि शङ्कास्पद सामान बरामद नगरेको परिवारको दाबी छ।
यसैबीच, मुम्बई प्रहरीले बुधबार कोटाबाट पक्राउ गरिएका फूल सिंह, ऋतिक कुमार र रेहानलाई मुम्बई ल्याएको छ। उनीहरूको स्वास्थ्य परीक्षण गराएपछि अदालतमा पेस गर्ने प्रक्रिया अघि बढाइएको प्रहरीले जनाएको छ। घटनामा पक्राउ परेका व्यक्तिहरूको भूमिका र हतियार आपूर्ति सञ्जालबारे थप अनुसन्धान भइरहेको छ।