वासिङ्टन । अमेरिकाको मध्यावधि निर्वाचनमा डेमोक्र्याटिक पार्टीले अप्रत्याशित सफलता हासिल गरेपछि कृत्रिम बुद्धिमत्ता (एआई) क्षेत्रमा लगानी गर्ने कम्पनीका लगानीकर्ता चिन्तित बनेका छन्। एआई पूर्वाधार निर्माणमा सरकारी नियमन थप कडा हुन सक्ने आशङ्काले बिहीबार अमेरिकी प्रविधि कम्पनीका सेयरमा ठूलो गिरावट आएको छ।
निर्वाचनमा डेमोक्र्याटहरूले सिनेटमा सात र प्रतिनिधिसभामा कम्तीमा ३९ सिट थपेका छन्। त्यस्तै, पाँच राज्यमा गभर्नर पदसमेत जितेका छन्। निर्वाचनको यो नतिजाले एआई पूर्वाधार विस्तारमा अवरोध आउन सक्ने चिन्ता लगानीकर्तामा बढाएको हो।
बिहीबार अमेरिकी प्रविधि कम्पनीहरूको बाहुल्य रहेको नास्डाक कम्पोजिट सूचकाङ्क ५.५६ प्रतिशतले घटेको छ। यो पछिल्लो १९ महिनायताकै सबैभन्दा ठूलो एकदिने गिरावट हो।
विशेषगरी डेमोक्र्याटहरूले डेटा सेन्टर निर्माण तथा सञ्चालनमा कडा नियमन गर्न सक्ने सम्भावनाले सेयर बजार प्रभावित भएको हो। एआई प्रणाली सञ्चालनका लागि आवश्यक डेटा सेन्टरले ठूलो मात्रामा विद्युत् र पानी खपत गर्ने भएकाले स्थानीय समुदायमा समेत यसको विरोध बढिरहेको छ।
टेक्सासको गभर्नरमा निर्वाचित डेमोक्र्याटिक उम्मेदवार जिना हिनोजोसाले नयाँ डेटा सेन्टर निर्माण रोक्ने प्रतिबद्धता जनाएकी छन्। उनले तीन कार्यकालदेखि गभर्नर रहेका रिपब्लिकन ग्रेग एबटलाई पराजित गरेकी हुन्।
त्यस्तै, अमेरिकी कङ्ग्रेसका डेमोक्र्याट सांसदहरूले डेटा सेन्टरका कारण उपभोक्ताको विद्युत् महसुल बढ्न नदिन नयाँ कानुन ल्याउनुपर्ने र एआई प्रणालीको स्वतन्त्र परीक्षण अनिवार्य गर्नुपर्ने माग गरेका छन्।
लगानी अनुसन्धानकर्ता मेलिसा ब्राउनका अनुसार एआई पूर्वाधार निर्माणको गति सुस्त भएमा यस क्षेत्रमा आधारित आर्थिक वृद्धिको अपेक्षामा असर पर्न सक्छ।
यसैबीच, अलास्का र मिसिसिपीको सिनेट निर्वाचनको अन्तिम परिणाम आउन बाँकी छ। ती दुवै स्थानमा डेमोक्र्याटहरू अगाडि रहेकाले सिनेटमा उनीहरूको सिट सङ्ख्या ५६ पुग्न सक्ने सम्भावना छ।
नयाँ सिनेट जनवरीदेखि क्रियाशील हुनेछ। त्यसपछि डेमोक्र्याटहरूले राष्ट्रपति डोनाल्ड ट्रम्प प्रशासनका निर्णयमाथि अनुसन्धान अघि बढाउन तथा सरकारी नियुक्तिमा अवरोध सिर्जना गर्न सक्नेछन्।