काठमाडौँ: नेपाली कांग्रेसका महामन्त्री तथा सांसद गगन थापाले संविधान संशोधन गरेर संसदको अहिलेको आकार घटाउन सकिने बताएका छन् ।
मंगलबारको प्रतिनिधिसभा बैठकको विशेष समयमा बोल्दै महामन्त्री थापाले कांग्रेस एमाले मिलेर बनेको सरकारले संविधान संशोधनको कुरा गर्दा कतिपयले प्रतिगमनतिर फर्कन लागेको भन्ने आरोप लगाएको भन्दै त्यसलाई चिर्नुसक्नुपर्ने बताए । उनले संविधान संशोधन गरेर अहिलेको संसदको आकार घटाउन सकिने र समानुपातिक समावेशीलाई थप बढाउन सकिने बताए ।
‘कांग्रेस र एमालेबिचमा भएको सात बुँदे समझदारीमा राजनीतिक स्थायित्वका लागि संविधान संशोधन गर्छौ भनिएको छ’, उनले भने, ‘तर कतिपयले संविधान संशोधन गरेर प्रतिगमन वा पछाडि फर्कन लागेको हो ? भनेर प्रश्न गरिने गरिएको छ ।’
उनले संविधान संशोधन गरेर जम्बो संसदको आकार घटाउन सकिने बताए । ‘संसदको जम्बो आकार घटाउन सकिन्छ । समानुपातिक समावेशी बढाउन सकिन्छ’, थापाको भनाइ छ ।
थापाले उठाउन बाँकी बिजुलीको बक्यौतामा एक रुपैयाँ पनि छोड्न नहुने बताए ।
‘राज्यकोषको एक रुपैयाँ पनि तलमाथि हुन दिन्न भनेर सरकारले विश्वास दिलाउन सक्नुपर्छ’, थापाले कसैलाई अप्ठ्यारो पार्न नहुने भन्दै भने, ‘विधिको शासन भनेको त्यही हो ।’
