काठमाडौँ: भारतले ‘अपरेशन सिन्दूर’ नाम दिइएको सैन्य कारबाही अन्तर्गत पाकिस्तानका नौ स्थानमा लक्षित हवाई आक्रमण गरेको छ। भारतीय रक्षा मन्त्रालयका अनुसार, ती स्थानहरूबाट भारतमाथि आतंकी गतिविधिको योजना र निर्देशन हुँदै आएको थियो।
यो कारबाही अप्रिल २२ मा भारत-नियन्त्रित कश्मीरमा भएको आक्रमणपछि गरिएको हो, जसमा २६ जना पर्यटकको मृत्यु भएको थियो। भारतले उक्त आक्रमणको दोष पाकिस्तानमाथि लगाउँदै जवाफी कारबाही स्वरूप यो आक्रमण गरेको बताएको छ।
वाशिङ्टनस्थित भारतीय दूतावासद्वारा जारी विज्ञप्तिमा भनिएको छ, “हवाई आक्रमण पूर्ण रूपमा लक्षित र सटीक थियो। केवल पहिचान गरिएका आतंकी शिविरहरूलाई मात्र निशाना बनाइएको हो।”
यता, पाकिस्तानी प्रधानमन्त्री शहबाज शरिफले भारतको कारबाहीलाई ‘युद्धको घोर उक्साहट’ भन्दै कडा शब्दमा निन्दा गर्नुभएको छ र बलियो प्रतिवाद गर्ने चेतावनी दिनुभएको छ।
संयुक्त राष्ट्रसंघले दुबै पक्षलाई संयमता अपनाउन आग्रह गर्दै चेतावनी दिएको छ, “दुई आणविक शक्तिहरूबीचको युद्ध केवल दक्षिण एशियामात्र होइन, समग्र विश्वका लागि खतरनाक हुन सक्छ।”
