बागमती प्रदेश सरकारले हेटौंडामा आयोजना गरेको एक कार्यक्रममा काठमाडौं र काठमाडौंवासीलाई गाली गर्न थालेपछि मेयर बालेन साह बीचमै कार्यक्रम छोडेर फर्किएका छन्।
स्थानीय जनप्रतिनिधिहरूका लागि आयोजित दुईदिने अभिमुखीकरण कार्यक्रममा एक दिन मात्र बसेर फर्केका मेयर साहले विज्ञप्ति जारी गर्दै भनेका छन्, ‘काठमाडौं राजधानी मात्रै होइन, अझ बागमती प्रदेशका लागि त एउटा पालिका मात्रै हो। काठमाडौं कसैको जन्मभूमि, कसैको कर्मभूमि हो। गाली गरिराख्ने तर मौका पाउँदा पनि केही नगर्ने कार्यक्रममा बस्नुको औचित्य नदेखेर कार्यक्रम छाडेको हुँ।’
काठमाडौं र काठमाडौंवासीलाई कसले गाली गर्यो ? जसको कारण मेयर शाह र उपमेयर डंगोल सोमबारै काठमाडौं फर्किए?
बागमती प्रदेशका मुख्यमन्त्री राजेन्द्रप्रसाद पाण्डेले कार्यक्रमको विषयवस्तुभन्दा बाहिर गएर काठमाडौंको फोहोरमैला उठ्न नसेककोबारे स्थानीय सरकारलाई आरोप लगाएका कारण मेयर र उपमेयर कार्यक्रमको बीचबाटै फ़र्किएका हुन्।
स्थानीय सरकार सञ्चालनसम्बन्धी तालिम दिने कार्यतालिका तोकिए पनि फोहोरमैलाको कुरा उठाएर काठमाडौंमाथि आरोप लगाउने काम मात्र भएको उनीहरूको भनाइ छ।
‘जुन विषयवस्तु निम्ति कार्यक्रम सञ्चालन गरिएको हो, त्यसैमा केन्द्रित भएर कुरा गर्नुपर्यो नि!’ स्वकीय सचिव भुपदेव शाह र सहायक सचिव नवीन भण्डारी भने, ‘त्यहाँ त आरोप-प्रत्यारोप मात्र भयो। यो कुरा मेयरसाबलाई मन परेन र कार्यक्रमको बीचमै फर्किनुभयो।’
अरू स्थानीय तह छाडेर मुख्यमन्त्री पाण्डे र अर्थमन्त्री शालिकराम जमकट्टेलले काठमाडौंको फोहोरमैलाको विषयमा मात्र आरोप लगाएको सचिवालयले जनाएको छ। मुख्यमन्त्री पाण्डेले काठमाडौं महानगरले आफ्नो फोहोर आफैं व्यवस्था गर्नुपर्ने तर्क गरेको भण्डारीले बताए।
‘मेयरसाब संस्थाको मानमर्यादा राखी कार्यक्रममा उपस्थित भए पनि विषयवस्तुभन्दा बाहिर रहेर कुरा गर्नु उचित होइन,’ उनले भने, ‘त्यसमाथि उहाँ यस विषयमा केन्द्रित रहेर पहिलो दिनदेखि काम गरिरहनुभएको छ।’
बालेनले गाली र आलोचना नै सुन्ने भए आफ्नै महानगरमा आफ्नै महानगरबासीहरूको सुन्ने वा सम्बन्धित व्यक्ति, समूह वा कार्यक्रमहरूमा सुन्ने बताएका छन्।
‘मर्यादापालन गरेर कार्यक्रममा गएको तर फजुल कुरा गर्दा समय खेर गयो,’ सचिवालयले भनेको छ, ‘काम नपाएर त गएको होइन, उहाँलाई अहिले पाँच मिनेट पनि महत्वपूर्ण छ।’
सोमबार बेलुकी मेयर शाहले फेसबुकमा स्ट्याटस राख्दै ‘बागमती प्रदेशले आयोजना गरेको काठमाडौं महानगरलाई गाली गर्ने कार्यक्रममा सहभागी भएर धेरै खुसी लागेको’ उल्लेख गरेका थिए।
कार्यक्रममा १३ जिल्लाका स्थानीय तहहरूका प्रमुख र उपप्रमुख सहभागी थिए।
